តាកែវ៖ កម្លាំងអាវុធហត្ថខេត្តតាកែវ ចុះឃាត់ខ្លួនជនសង្ស័យ៥នាក់ នៅចំណុចភូមិពានមាស ឃុំលំពង់ ស្រុកបាទី ខេត្តតាកែវ ពីបទក្លែងឯកសណ្ឋានកងរាជអាវុធហត្ថ។

កម្លាំងអាវុធហត្ថខេត្តតាកែវឱ្យដឹងថាបាន នៅថ្ងៃទី៩ ខែកុម្ភៈ ឆ្នាំ២០២៣ នៅពេលកម្លាំងអាវុធហត្ថខេត្ត បានចុះនៅចំណុចសមាគមន៍ជួយជនរងគ្រោះដោយសារគ្រឿងញៀន ស្ថិតនៅភូមិត្រពាំងព្រីង ឃុំលាយបូរ ស្រុកត្រាំកក់ បានចាប់ខ្លួនជនសង្ស័យ ១នាក់ បន្ទាប់មកក៏បានធ្វើការឃាត់ខ្លួនជនសង្ស័យបានចំនួន ៤នាក់បន្ថែមទៀត ពីបទក្លែងឯកសណ្ឋាន។

ជនសង្ស័យទាំង៥នាក់មានមុខរបរជាសន្តិសុខ ខណៈម្នាក់មានមុខរបរប្រធានសមាគមន៍ជួយជនរងគ្រោះដោយសារគ្រឿងញៀន រស់នៅភូមិត្រពាំងព្រីង ឃុំលាយបូរ ស្រុកត្រាំកក់ ។

ក្នុងប្រតិបត្តិការនេះដែរ សមត្ថកិច្ចបានចាប់យកវត្ថុតាងរួមមាន៖ ឯកសណ្ឋានកងរាជអាវុធហត្ថខោចំនួន ១២ខោ អាវយឺតចំនួន ៧អាវ មួក៩ ស្បែកជើងកវែងចំនួន ៧គូ ឯកសណ្ឋានយោធា ខោចំនួន ៣ខោ អាវយឺតចំនួន១ ឯកសណ្ឋាននគរបាល អាវ ចំនួន៤ ខោចំនួន២ ឯកសណ្ឋានអង្គរក្ស អាវយឺតចំនួន៤ មួកចំនួន៤ និងរថយន្តចំនួន ២គ្រឿងម៉ាកLEXUS 470 ពណ៌កាំម៉ៃ ពាក់ស្លាកលេខភ្នំពេញ ២ AL-4513 និង LEXUS 400h ពណ៌ត្រេអ៊ី ពាក់ស្លាកលេខខេមរភូមិន្ទ០២ ២-៨៩៨៥។

បច្ចុប្បន្ន ជនសង្ស័យទាំង៥នាក់ ត្រូវបានមន្ត្រីជំនាញកំពុងអនុវត្តនីតិវិធី។